IRRATIA.COM sareko euskal irratia

Click hemen gure kanal nagusian sartzeko.

Click hemen RealPlayer programarekin entzuteko.

ABENDUAK 18

Denok gara Xabier Montoia

Musikaria Euskadi Gaztea irratian zentsuratua

Xabier Montoia zentsuratua izan da Euskadi Gaztea irratian. Musikari eta sortzaile baten ahotsa zentsuratu dute. Adierazpen Askatasunaren alde gaudenok, bere alde egin behar dugu. Askatasunaren alde, ahotsaren alde. Musikaren alde.

Guk ere ozenki esan gura dugu: "Denok gara Xabier Montoia". Horregatik irratia.com-ek adierazpen askatasunaren alde dagoenez gero, bere kantuak lau haizetara hedatuko ditu, hemendik, Internetetik.

___________________

URRIAK 11

Fermin Muguruzarekin hizketan

"In-komunikazioa" disko berriaren inguruan

Disko berria kaleratu berri du, In-komunikazioa izenburukoa. Fermin Muguruza arras ezaguna dugu euskal musikan eta bere inoizko diskorik pertsonala atera berri du. Fermin Etxegoienek elkarrizketatu zuen irailaren 30an Bilbo Hiria Irratiko "Ziutateaz" magazinean.

Elkarrizketa entzuteko (mp3) [JAITSI].

___________________

URRIAK 11

Elektronikaldia Donostian

Teknologia berriak eta musika lotzen ditu jaialdiak

Urriaren 11, 12 eta 13an Elektronikaldia izango dugu Donostian. Musika elektronikoa ez ezik, elektronikaren inguruko jaialdia ere bada Donostiako nazioarteko jaialdi hau. Artea, tendentziak, informazioa, teknologia berriak uztartzen dituen jaialdia da asteburukoa. Laugarren edizio honetan, iaz bezala bi gune nagusi izango ditu jaialdiak: Kursaal eta Gasteszena. Eguneko ekitaldiak Kursaalen burutu ostean, gauean dantzarako erritmoak Egiako Gasteszenako bi aretoetan burutuko dira.

Elektronikaldia musika jaialdi indartsua da, nazioarteko mailakoa. Aurten aukera paregabea dugu New York, London eta inguruetako talde eta erreferentzia berritzaileak gurean ikusi eta entzuteko. Gasteszena aretoan gauez sekulako martxa izaten da, Chill On aretoak dantzatzeko aukera eskaintzen du batez ere, eta Areto nagusiak zuzeneko emankizunak izaten dira. Ostiralez (urriak 11) Zero (bcn), Ino "funky soul rebels" (glz), Watch TV (mad) eta Turntables on the hudson (NYC-USA) arituko dira. Larunbatean berriz (urriak 12) proposamenak jende gehiago bildu dezake, batetik Bartzelonatik The Nairobi Trio (txarly brown, eva braun, rude taylor). Wagon Cookin musikari nafarren kontzertua izango da aurtengo elektronikaldiko ezustekoetako bat, sekulako emanaldiak eskaintzen dituztelako Garaialde anaiek. Ostean Londonetik hurbildutako beste bi proposamen izango dira Egiako gau dantza zoragarrian, Tim "love" lee soundsystem, eta London electricity... dantzan zoratzeko modukoa!

Euskal Herriak ere badu bere ordezkaritza eta besteak beste aurten lehenengoz, Demo lehiaketan irabazle suertatutako zenbait proiektu zuzenean ikusi ahal izango ditugu: Gasteizko Cubo, Ibon Saez de Olazagutiaren irudiekin izango da, Donostiako dj IÒaki , Gasteizko Urbain in fussion beraien jazzy beats doinuekin, Donostiako Nomaklimatoren zuzenekoa, IruÒeako Chit chat proposamen elektroa eta Gasteizko Alen Lopetegi. Euskal Herrian doinu elektronikoek gaurkotasuna ez ezik, freskotasuna ere badutela adierazten. Guzti hauek Elektronikaldia Demo izeneko disko batean agertuko dira aurki.

Euskal Herriko proposamen gehiago ere izango da aurtengo edizioan. Larunbatean (urriak 12) Elorrioko logela proposamena ikusi ahal izango da Kursaaleko areto batean, arratsalde berean Chico y chica (Bilbo) ere zuzenean arituko dira. Igandeko proposamen euskaldunak DZ (dj Zigor) eta -gailu dira.

___________________

MARTXOAK 21

Arrazakeriaren aurkako eguna

Irratsaio berezia egun osoan zuzenean

Gaur, martxoak 21 Arrazakeriaren aurkako nazioarteko eguna da. Hori dela eta, Tas-Tas Irrati Librean 24 orduko programazioa ari dira egiten. AHLAN - ONGI ETORRI irratsaioa antenan dago atzoko 19.00etatik gaurko 20.00etara. Irratsaio berezi honetan etorkinek gurean bizi duten egoeraz jardungo dute, besteak beste. Musika ona, gonbideatuak eta sorpresa zenbait izango dira ere.

Irrati komunitarioen AMARC elkartearen ekimena da hau, mundu mailan egiten dena eta egun osoan entzungai izango dugu programazio berezi hau zuzenean IRRATIA.COM euskal irrati digitalean. Iaz 500 emisorak esku hartu zuten ekimen honetan eta aurten are gehiago izango dira. FM, SW eta Internet bidez emititzen ari dira egun honetan, bakoitzak programazioko aukera bat nazioarteko zentrura bidaliz.

1960ko martxoaren 21an Hego Afrikako Sharpeville hirian poliziak 69 lagun hil zituen, apartheid-aren "pass law" legearen aurkako manifestazio baketsu baten aurka tiro eginda. Sei urte beranduago, NBEk egun hori arrazakeriaren aurkako nazioarteko eguna izendatu zuen.

___________________

MARTXOAK 11

bxt hil zaigu

Bixente Iriart garaztar musikaria zendu da

Bixente Iriart artista garaztarra zendu zaigu derrepentean. Iragan martxoaren 8an, ostiral goizean Parisen, 30 urte zituela, burmuineko zain batek lasatu ondoren hil da BXT.

Musikari gazte, dinamikoa eta ezaguna genuen gure artean bxt, besteak beste Basque Electronic Diaspora ekimeneko sortzaile eta bultzatzaile nagusia zelako. Iaz, "Soupcons" (Xorta) diskoa kaleratu zuen, berak sortutako Counter-Reset disketxearen bidez, Parisen eta gero Euskal Herrian ere banatua izan zena.

Irratia.com egitasmoa hasieratik lagundu zuen gogoz Bixente Iriart gure lagunak. Eta Basque Electronic Diaspora eta gure Internet bidezko irratiaren artean burutu genuen proiektu bat baino gehiago. Beraien kantak sarean jarri genituen, Bilbon BED#2 aurkezteko eskainitako kontzertua zuzenean eskaini genuen mundu osora eta elkar ulertu genuen.

Euskal Herrian emanaldi asko eginikoa genuen, azkena iazko Elektronikaldian. Hala ere, musika elektronikoaren munduan abiatu aitzin hainbat musika taldetan gitarra apala (baxua) jotzen aritua baitzen, tartean Anje Duhalde edota Txakun bezalako taldeetan. Euskal Herriak musikari handi bat galdu du. Sortzailea, mundu berrietan abiatu zena. Mundu osoko euskal musikariak batzeko gaitasuna ukan duena, eta hemen eta han proiektu anitz abiatzen aritu dena. Gogoan zaitugu gure bxt laguna, atxik gogor!

BXTri IRRATIA.COM-en eginiko elkarrizketa IRAKURRI

BED#2-ren aurkezpen kontzertua Bilbon ENTZUN (RealAudio)

Bixente Iriarten ARGAZKIA (2048x1536pixel) IRRATIA.COM-ek egina 2001/5/10 Bilboko Kafe Antzokian. Libreki erabiltzeko.

___________________

OTSAILAK 21

Joseba Tapia gerrako kantuekin

"Agur Intxorta Maite" gaur Kafe Antzokian

Gerra zibilaren garaitik argazkiak, letrak eta filmak heldu zaizkigu aspaldi honetan. Orain artean, hala ere, betetzeke zegoen eremu bat osatu dute Joseba Tapia musikariak eta Koldo Izagirre idazleak. Lan handia eginez, liburutegietan, lekukoekiko elkarrizketetan eta materialari forma emanez lortu dute gerra galdu zuten euskaldunek trintxeretan sortutako kantutegia berreskuratzea. "Agur Intxorta maite" du izena berau biltzen duen diskoak eta egunotan aurkezten ari da Joseba Tapia kontzertuen bidez. Gaur Bilboko Kafe Antzokian eskainiko duen emanaldian Basilio Pujana gudaria izango dugu Tapia eta Izagirre bikotearekin, irudiz lagundutako emanaldian.

Lan honen gaineko informazio gehiago ARGIA astekariaren azken zenbakian irakur dezakegu: HEMEN eta HEMEN.

___________________

OTSAILAK 13

Gaubasa.com sarean entzungai

Webgunea eta zuzeneko irratsaioa

Aurrerantzean, asteazkenero gaueko 20.00etatik aurrera, GAUBASA irratsaioak ordezkatuko du Jalgi Hadi Dantzarat! irratia.com-en dial birtualean. Egun eta ordu berean, beraz, GAUBASA izango dugu. Baina zuzeneko emisioa ezezik, GAUBASA.COM webgunearekin dator irratsaioa. IRRATIA.COMen eskutik, bertan Gaubasa unibertsoa ezagutzeko aukera izango duzue, baita aurreko irratsaioak eta Basakatuaren irakurketak entzuteko ere.

Bilbo aldean "bonba mediatikoa" den GAUBASA irratsaioa Bilbo Hiria Irratiaren bidez aireratzen da uhainetan. "Batetik Dupont eta Dupond-en eskutik raw-a eta punk-rock-a, eta Basakatu pertsonaiaren irakurketa harrigarriak bestetik tartekatzen dituen picnic-irratsaio ezinezkoa da, parametro normaletatik ulertezina. Lurreko produktuak dastatu bitartean egiten den artelan azpikulturala da Gaubasa, uhinetako happening hedonista". Hain zuzen ere, hedonismoa bultzatzeko xedea du GAUBASAk, berehalako plazerra. Sareko entzuleentzako Bilboko Kafe Antzokian egunotan izango diren zenbait kontzertutarako sarrerak banatuko ditugu, irratsaiora telefonoz deitzen duten entzuleen artean. Beraz, adi egon eta asteazkenetan entzun ezazue GAUBASA online.

___________________

OTSAILAK 4

Pititako Irratia sarean entzungai

Zuzenean Santurtzitik mundu osora

Santurtziko Pititako irrati librea Interneten bidez ari da emititzen jada. Probetan ari dira eta ez dute, momentuz, egun osoz emititzen. IRRATIA.COMek erabiltzen duen shoutcast sistema bera erabiltzen dute euren seinalea igortzeko. Beraz, entuteko arazorik edukiz gero, hementxe aurkituko dituzue Shoutcast emisioak entzuteko azalpenak eta softwarea eskuratzeko loturak. Berton duzue, halaber, Pititako entzun ahal izateko LOTURA.

Nabigatzailea konfiguraturik ez baduzue, soluzio "manuala" erabili: Kopiatu ezazue IP helbide hau (control+C): 80.34.69.159:8000 ...Zabaldu ezazue shoutcast emisioak entzuteko instalatuta duzuen programa (RealPlayer 7+, Winamp, iTunes... Hainbat daude). Bertan zaudetela, aukeratu "open location" edo "abrir URL" (normalki control+L)... ...Eta itsatsi bertan lehen kopiatu duzuen IP helbidea.

___________________

OTSAILAK 1

Irrati emanaldi bereziak

NYC, Munich eta Porto Alegretik zuzenean

Urtarrilaren 31tik otsailaren 5era: Munduko Ekonomia Foroa New York-en bilduko da. Manifestazioak izango dira bertan munduko agintari nagusiei beste mundu bat posiblea dela gogorarazteko. Aldi berean Munduko Forum Soziala Brazilgo Porto Alegre hirian bilduko da. NATOren Segurtasun Gailurra Munichen (Alemania) bilduko da protesten artean. Hiru herrialde horietako irrati batzuek, Indymedia proiektuarekin bat egingo dute bertan gertatuko direnak aireratzeko (eta sareratzeko). Horrez gain, irratsaio bereziak entzun ahal izango dira San Francisco, Seattle, Britainia Handia eta Indiako zenbait irratik eginak.

IRRATIA.COMek ere bat egiten du ekimenarekin eta gure emisioak bat egingo du emisio berezi honekin. Beraz, otsailaren 4a bitartean gure sintonian Independent Media Center-en emisioa aurkituko duzue.

___________________

URTARRILAK 25

Sareko Argia saria ZIENTZIA.NETentzat

Iazko saritua IRRATIA.COM izan zen

Gaur banatu dituzte Argia Sariak Lasarteko Txitxardin Beltxa jatetxean. Beste zenbait arlotako Argia sarien artean, Interneten euskaraz joan den urtean sorturiko ekimenik onena saritzen duen Sareko Argia Saria Elhuyarrek argitaratzen duen ZIENTZIA.NET zientza eta teknikari buruzko atari eleanitzak eraman du. Hauexek izan dira, ARGIA aldizkariko arduradunen hitzetan, ZIENTZIA.NETek egin dituen merezimenduak:

"Duela urtebete sortu zen, 2000ko abenduan, baina aurkezpen ofiziala 2001eko ekainean egin zuten. Zientzia.net (www.zientzia.net) gunearen helburua zientzia eta teknologiaren berri ematea da, euskaraz, teknologia berriak erabiliz eta modu errazean. ´Ikusten genuen Elhuyarrek gauza asko egiten zituela multimedia arloan, eta Interneten eta euskaraz zerbait egin beharraz ohartu ginen, gaur egun informazioa bilatzen duten askok Internet erabiltzen baituteª, dio Leire Cancio Zientzia.net-eko marketing arduradunak".

Iragan urteko Sareko Argia Saria IRRATIA.COM-entzat izan zen. Horren gaineko informazio gehiago HEMEN duzu.

___________________

URTARRILAK 16

GAUBASA zuzenean gaur

Jalgi Hadi Dantzarat-en ordez

Gaur ez da Jalgi Hadi Dantzarat! irratsaioaren emisiorik izango, gure esatari DJ Kaiku Berlinera joana baita nazioarteko Indymedia topaketara. Bertako saltsari buruz informazioa emango digu datorren astean baina bitartean ez gara saiorik entzun gabe geratuko.

Egun eta ordu berean, gaur asteazkena gaueko 20.00etatik aurrera, Bilbo aldean bonba mediatikoa den GAUBASA irratsaioa zuzenean entzuteko aukera izango duzue. Batetik Dupont eta Dupont-en eskutik raw-a eta punk-rock-a, eta Basakatu pertsonaiaren irakurketa harrigarriak bestetik tartekatzen dituen picnic-irratsaio ezinezkoa, parametro normaletatik ulertezina. Lurreko produktuak dastatu bitartean egiten den artelan azpikulturala da Gaubasa, uhinetako happening-a.

Datorren astetik aurrera sarean dastatu ahal izango duzue Gaubasa, baina bitartean har ezazue lagin txiki bat IRRATIA.COMen. On egin!.

Iragan asteko GAUBASA entzuteko (mp3) ENTZUN.

___________________

Aholkua: Letra bat ken, izarño bat gehi (*) Urrezko araua euskaraz ezer bilatzeko. Adibidez, Bizkai* edo dantz*

Aholkua: Letra bat ken, izarño bat gehi () Urrezko araua euskaraz ezer bilatzeko. Adibidez, Bizkai edo dantz*