8. saioa: Aurki berria, euskal blogak

Gaurko saioko albiste nagusia Aurkiren birmoldaketa izan da. Dmoz-en euskarazko moldaketa eskaintzen zigun orain arte, baina orain, horrez gain, oso bestelako zerbitzua eskaintzen du: Google News-en antzerako albiste bilgunea dugu, iturri anitzeko azken albisteak bilduz eta orrialde bakarrean eskainiz. Era automatizatuan eta sarri egiten du lan hori. Aurkik, berriz, gure hizkuntzan idatzitakoak biltzen ditu. Bestalde, Bloglines zerbitzuaren antzera, gure RSS jariorik gogokoenen bilduma egiteko aukera damaigu.

Saioa eskuratzeko egin klik HEMEN (MP3 56 Kbps mono, 24 MB).

Euskal blogosfera eta blogarien motibazioak izan ditugu hizpide, prentsan bi erreferentzia agertu baitira: Gabiriaren zutabea Berrian eta We the mediaren idazle Dan Gillmor-i elkarrizketa El Correo-n. Besteak beste, Google videos, Ask Jeeves-Bloglines, Korrikaren bideoa, Peer2mail joera, MSN Search eta software patenteak aipatu ditugu gaurkoan.